Президенти Федератсияи байнулмилалии бокс – AIBA, мансабдори маъруфи соҳаи варзиши Русия Умар Кремлёв дар рӯзҳои ҷашни Наврӯз бо хоҳиши падараш ба зодгоҳи таърихии худ – Ҳисор омадааст. Ӯ ваъда додааст, ки дараи Алмосиро обод карда, роҳро таъмиру навсозӣ мекунад ва инчунин маҷмаааи савдову хидматрасонӣ ва мактаби таълиму машқи бокс месозад.

Ӯро раиси шаҳри Ҳисор Қосим Роҳбар ва собиқ муовини сарварзири кишвар Муродалӣ Алимардонов ба ҳузур пазируфтанд. Дар вохӯрӣ инчунин, падари Умар Кремлёв – Назар Сафаров, айни замон шаҳрванди Русия ва зодаи деҳаи Хонақоҳи Кӯҳӣ мебошад, ҳузур дошт.

Зимни суҳбат бо раиси шаҳр, Умар изҳор намудааст, ки бо хоҳиши падараш тасмим гирифтааст, ки як гӯшаи Тоҷикистон, зодгоҳи волидонаш – деҳаи Гулхонаи ҷамоати деҳоти Хонақоҳи Кӯҳиро дар дараи Алмосӣ обод кунад.

Аз чап - Назар Сафаров, дар паҳлӯяш - писараш Умар Кремлёв
Сурат: хадамоти матбуоти ҳукумати шаҳри Ҳисор

Дар лоиҳаи аввал таъмиру навсозии қитъаи роҳи 20-километрии оғозаш аз шоҳроҳи Душанбе-Турсунзода пешбинӣ гардидааст. Қитъаи роҳ мутобиқи талаботи меъёрҳои байнулмилалӣ таъмиру таҷдид хоҳад шуд.

Боз кардани он то охири тобистони соли равон – дар остонаи ҷашни Истиқлолияти Тоҷикистон ба нақша гирифта шудааст.

Кремлёв ҳамчунин ваъда додааст, ки дар маркази ҷамоати деҳоти Хонақоҳи Кӯҳӣ маҷмааи бузурги савдо ва хидматрасонӣ бунёд мекунад.

Бо пешниҳоди Қосим Роҳбар дар маркази шаҳри Ҳисор Умар Кремлёв мактаби таълиму машқи бокс боз карда, он ба номи Назар Сафаров гузошта мешавад.

Сурат: хадамоти матбуоти ҳукумати шаҳри Ҳисор

Умар Кремлёв аз 12 декабри соли 2020 ба ҳайси президенти Ассотсиатсияи байнулмилалии бокс (AIBA) кор мекунад.

Ба иттилои ВАО-и Русия, ӯ 1 ноябри соли 1982 дар оилаи Назар Сафаров ва Олга Кремлёва ба дунё омадааст.

Дар Академияи давлатии хоҷагии коммуналӣ ва сохтмони Маскав маълумоти олӣ гирифтааст.

Соли 2018 Кремлёв ба Кумитаи иҷроияи Ассотсиатсияи байнулмилалии бокс (AIBA) пазируфта шуда, аввалин намояндаи Русия дар ин ниҳод буд.

Пас аз барканор шудани Ғафур Раҳимов, соли 2020 Ассотсиатсияи байнулмилалии бокс (AIBA) номзадии Кремлёвро ба мансаби президентӣ бо аксарияти овозҳо маъқул донист.

Дар саҳифаи "Instagram"-аш Кремлёв ҳамчун шахсият муваффақ – варзишгар, роҳбар ва инсони хайрхоҳу эҳсонкор таҷассум меёбад.

... Ғафур Раҳимов соҳибкор аст. Соли 2019 дар робита ба нақшаи Кумитаи байнулмилалии олимпӣ дар робита ба  барномаи бозиҳои олимпии соли 2020 дар Токио хориҷ кардани  бокс бо сабаби интихоби Раҳимов, ки ба алоқа доштан бо олами ҷиноӣ айбдор мешуд, аз мансаб истеъфо дод.

Дар Telegram, Facebook, Instagram, OK ва ВК бо мо бимонед.