Додгоҳи марҳалаи назоратии шаҳри Душанбе ҳам ҳукми 7,5 соли зиндони Абдуллоҳ Ғурбатӣ, яке аз рӯзноманигорони маҳкумшудаи тоҷикро бетағйир гузоштааст. Дар ин бора Дилафрӯз Самадова, вакили дифои ин рӯзноманигор ба “Азия-Плюс” хабар дод.

Абдулоҳ Ғурбатӣ рӯзи 4-уми октябри соли гузашта бо се моддаи Кодекси ҷиноятӣ, аз ҷумла ҳамкорӣ бо ҳизбу ҳаракатҳои мамнӯъ гунаҳкор ва бо ҳукми Додгоҳи ноҳияи Шоҳмансур ба 7 солу 6 моҳ равонаи зиндон гардида буд.

Қаблан, додгоҳи марҳалаи кассатсионии шаҳри Душанбе ҳам ҳукми Додгоҳи ноҳияи Шоҳмансурро нисбати ин рӯзноманигори тоҷик бетағйир гузошта буд.

Дилафрӯз Самадова гуфт, мурофиаи марҳалаи назоратӣ рӯзи 14-уми июли соли равон баргузор гардид ва талаби онҳо ин буд, ки ҳукми додгоҳи ноҳияи Шоҳмансур нисбати Абдуллоҳ Ғурбатӣ бекор карда шуда, парвандаи ҷиноятӣ нисбати ӯ қатъ гардад.

“Дар шикояти назоратии пешниҳодшуда як қатор далелҳо, аз ҷумла хулосаҳои ташхис, ки асос барои қабул кардани ҳукми айборкунанда нисбати Ғурбатов А. (Абдуллоҳ Ғурбатӣ-аз идора) гашта буд, манзур карда шуд. Ин хулосаҳо бо вайрон намудани қонуни мурофиавӣ ва қонуни соҳавӣ дар бораи экспертизаҳои судии давлатӣ ба парвандаи ҷиноятӣ ҳамроҳ карда шуда буданд. Ба суди марҳилаи якум зарур буд, ин хулосаҳоро тибқи талаботи моддаи 88.1 Кодеки мурофиаи ҷиноятии Тоҷикистон далели ғайриқобили қабул эътироф намуда, ба асоси айбдоркунии Ғурбатов А. истифода набарад”, - гуфт Дилафрӯз Самадова.

Ӯ гуфт, вале додгоҳи марҳилаи назоратӣ ваҷҳои пешниҳодкардаи онҳоро рад кардааст.

Ин вакили дифоъ афзуд, нақша доранд, бо шикояти назоратӣ ба Додгоҳи олии Тоҷикистон ва Ваколатдор оид ба ҳуқуқи инсон муроҷиат намоянд.

Дар ҳамин ҳол, Мубораки Қосим, ҳамсари Абдуллоҳ Ғурбатӣ дар суҳбат бо “Азия-Плюс” гуфт, “дар ҳолати қонеъ нашудани шикояти назоратӣ аз сӯи Додгоҳи олии Тоҷикистон нақша доранд, ки аз механизми байналмилалии ҳифзи ҳуқуқи инсон истифода карда, ба Созмони Миллали Муттаҳид муроҷиат  кунанд”.

Номбурда афзуд, барои исботи бегуноҳии шавҳараш ва бекор кардани ҳукми Додгоҳи ноҳияи Шоҳмансур то охирин зинаҳои судӣ шикоят мекунанд.

Ёдовар мешавем, ки Абдуллоҳ Ғурбатӣ яке аз чор журналистони маҳкумшудаи тоҷик аст. Ӯ замоне боздошт гардид, ки дар робита ба парвандаи Далери Имомалӣ, блогер ва рӯзноманигори дигари маҳкумшудаи тоҷик ба додситони ноҳияи Шоҳмансур даъват гардид.

Дар оғоз, мақомот ӯро барои “таҳқири намояндаи ҳокимият, истифодаи зӯроварӣ ба муқобили намояндаи ҳокимият” гумонбар медонистанд, вале баъдан Абдуллоҳ Ғурбатӣ ба аъзогии ҳизби дар Тоҷикистон мамнуи наҳзати исломӣ гумонбар дониста шуд.

Мурофиҳои додгоҳии Абдуллоҳ Ғурбатӣ дар боздоштгоҳи муваққатӣ (СИЗО) баргузор гардид ва ӯ зимни сухани охирини худ таъкид намуда буд, ки гунаҳкор нест ва ҳеҷ яке аз гуноҳи эълоншударо эътироф намекунад.

Дар як соли охир, ба ғайр аз Абдуллоҳ Ғурбатӣ се рӯзноманигори дигари тоҷик - Далери Имомалӣ, Завқибек Саидаминӣ ва Абдусаттор Пирмуҳаммадзода низ боздошт ва ба муҳлатҳои аз 7 то 10 сол зиндонӣ шуданд.

Созмонҳои ҳомии ҳуқуқ боздошту муҳокима ва ҳукми рӯзноманигоронро ғайриқонунӣ хонда, аз мақомоти Тоҷикистон даъват карданд, ки онҳоро фавран озод кунанд.

Дар Telegram, Facebook, Instagram, OK ва ВК бо мо бимонед.